إنه «الفيسبوك».. عدو مبارك اللدود.. لقد عثرت عليه بالصدفة عندما كنت أتصفح أصدقاء أصدقائى ووجدته بينهم.. لم أصدق فى البداية أنه من الممكن أن يكون من مستخدمى هذا العالم الافتراضى المدهش .. وتصورتها مزحة من أحد الهاكرز.. لكن بعد أن فتحت الصفحة وجدتها له بالفعل، خاصة «الفيسبوك» كان السبب الأول وراء ثورة «25 يناير» ودفعنى الفضول وحب الاستطلاع إلى الضغط على صورته وتوالت الاكتشافات.
اسم الصفحة «الرئيس مبارك» المهنة «رئيس جمهورية» تخرج من الكلية الحربية ، المدرسة الثانوية: المساعى الثانوية ـ شبين الكوم ، الإقامة القاهرة، متزوج، ولد فى4 مايو 1928، البريد الإلكترونى: president_mobarak@yahoo.com ـ عدد الأصدقاء: 311 ـ عدد الصور: 43 ـ من هؤلاء الأصدقاء : الفنانة ياسمين عبدالعزيز ـ العائلة (جمال وعلاء) بطوط شكرى ـ طلحة الشميرى ـ قناة العربية [التى اختصها بحديثه الصوتى الوحيد بعد خلعه] لكن الصفحة حاليا مغلقة.
والمؤكد أنه لم يتم تحديث الصفحة منذ فترة حيث لم يتم تغيير الوظيفة إلى سابق ولم يتم تغيير محل الإقامة إلى مستشفى شرم الشيخ كما أن عدد الأصدقاء قليل جدا بالنسبة لرئيس جمهورية.
وتوجد من بين الصور صورته وهو بالترينج الأبيض خلال رحلة علاجه الأخيرة بالخارج وصورة له وهو مع الرئيس السادات وأخرى وهو يقود الطائرة أما أكثر صورة حظيت بأكبر قدر من التعليقات الطريفة فهى صورته على علبة جبن مثلثات.
ففى 10 ديسمبر 2010 يعلق Yaser Maher على الصورة بضحكات متوالية طويلة هههههههههههه...فيرد عليه Check Mate ههههه شكلنا هنروح فى داهية يا (.....) ... و هنضحك لما نعيط.
ويرد عليه Yaser Maher بقوله ( محدش هيعرف يعمل معانا حاجة فينصحه Check طب اسكت بقى لتقلب بجد فيرد Yaser Maher لا لا جد إيه الريس ده حبيبى وابن حبيبى وماما سوزى روحى وبنت روحى ويقول له Check Mate هشتكنا وبشتكنا يا ريس ... ده انت رئيس والنعمة كويس.
وتعلق Yasmin Omar بقولها طعمة أوى الصورة دى ههه فيرد عليها Samar والله ما يصح كده ده عيب على اللى مربيهم.
ويكتب Hazem Samir ElQady ودى ألفها فى رغيف ولا أكلها كدة ... الله يحرقك روحنا فى داهية.
وتقول Malak Ibra إيه الجمال ده ماكنتش أعرف إنه حلو أوى كده. أما «جيجى مسامير» فتقول أنا حضرت الشنطة إن شاء الله كلة فى الكلابووش.
وتكتب Gen Mag ههههه وياريت بتفرج ويحس إن حتى الجيل الجديد قرف اللى يكون فى عون الجيل القديم. وتعلق Gen Mag بقولها: السجن للجدعان يازومة فيرد عليها Hazem أيوة ما أنتم بتقولوا كدة علشان ماتلاقوش اللى يقولكم راحين فين وجين منين آه منكم أنتم اتقتلوا القتيل وتمشوا فى جنازته.
بعد أيام من اندلاع الثورة كتب فيصل السبيعى فى 29 يناير: «هذى سبب المظاهرات هههههه».
ويقول Rona لو كان شكل البقرة نبقى كلنا بقر عمل كتير عشانا فاته حاجات كتير بحاول يصلحها نساعده منحجرش عليه وتضيف: أنتوا بتضحكوا على أساس إيه خراب بلدنا اقتصادنا سياحتنا عدم الأمان لينا الرعب والخوف تهزئ البلاد الخارجية لينا شكلنا بقى حقير على مستوى العالم فعلا أتق شر من أحسنت إليه.
يرد عليها Mustafa Gado أنتى مش عايشة فى الدنيا ولا أنتى مندسة "حقيرة" زى الباقيين.
وبعد أن تخلى الرئيس السابق عن الحكم بيومين كتبت «سندريللا » فى 13 فبراير والله حماتى فضلت تبكى لحد متعبت جدا أول مسمعت اللى حصل.. فيرد عليها Mostafa elhady سندريللا هيه بكت لأنها بتحبه ولا بكت من الفرحة إنه مشى؟.
ترد عليه سندريللا : تذكروا قول الحبيب ليس منا من لم يوقر كبيرنا، ومن يعترض على كونه الكبير مقاما فهو كبير سنا على أقل تقدير» «ولم ولن أقبل بأى شماتة من أى شامت يملأ قلبه الحقد تجاه قائد عظيم وتذكروا قول الحبيب المصطفى لا تظهر الشماتة لأخيك فيرحمه الله ويبتليك، فيعلق Mostafa elhady لا لا مش وقت الكلام ده نهائى كلامك صح ومظبوط، لكن الأفاقين والسارقين واللصوص والقتلة وقاطعى الأرزاق ومستحلى الأعراض لا يجوز لهم أن نوقرهم ونمنع الشماته فيهم بل واجب علينا التشهير بهم ليكونوا عبرة لغيرهم هوه الإعدام للقاتل حسب الشرع اللى بتتكلمى عنه مش بيبقا فى ميدان عام والسارق مش بيبقا فى ميدان عام والزانى مش بيترجم برضة فى ميدان عام.. وشكرا أخت سندريللا خليكى فى أوهامك أنت لسه موصلتيش للحقيقة.
أما هشام السيد السويركى فيقول: ياللاه معلش هى الدنيا كدة وكتب Yosef Elwsemy يقول انا نفسى بجد احيى الزعيم والقائد والرئيس السابق محمد حسنى مبارك على كل شى وأتمنى له الصحة ودوام العمر بجد هو مش يستاهل كل ده هو مهما كان راجل مصرى من الجيش المصرى العظيم وهو رجل حارب من أجل مصر وصدقونى اللى يحارب اليهود عمرو ما يخون مصر بجد هو رجل عظيم. فيرد عليه Mostafa elhady هوه مكانشى وحدة كان معاه رجالة أفضل منه ألف مرة لهم صحيفة وذكر واسماؤهم معروفة كمان.
والشئ الغريب أن هناك تنبيها على هذه الصفحة يبدو أنه من إدارة «فيسبوك» ينفى علاقة الرئيس بهذه الصفحة، والسؤال اللافت للنظر هو: إذا كانت إدارة الفيسبوك تعلم عدم صحة بيانات صاحب أى صفحة فلماذا تتركها على الموقع؟
وأخيرا دفعنى الفضول أكثر إلى الضغط على خانة (إضافة صديق) لأرى هل سيأتينى رد على طلب الصداقة أم لا؟.. مضت أيام ولم يوافق الرئيس (السابق) حتى الآن على طلبى.
